الرئيسية
آدي عيد ميلادي
يابلادي ...
آدي عيد ميــــــــــــلادي
خمسين سنه بيعدوا
زى قضبان حديد و اتمدوا
و " القطر " واقف مطرحُهُ
ولا راحش غادي
آدي عيد ميـــــــــلادي
*******
ياولادى ...
يازرع العُمر طارح في الأيادي
بتقولوا ؛ ابوكم مفيش أدوُّ
وهو غلبان ؛ حالهُ على أدوُّ
عايش بوهم مفرحُهُ
عاجز ... و راضي
آدي عيد ميــــــــــــــــــلادي
*******
يا فؤادى ...
ياطير مسبْح في البــوادي
و ألفْ أيِّد بتشدوه
ترسم له ُباب في السما ؛ وتسِدهُ
و"الحب" ... سهم يجرحُهُ
والعشق حــــــــــادي
آدي عيد ميـــــــــــــلادي
*******
أيه حصـــــــــــادي ؟
بعد ما زرعت الأمل في كل وادي
لا فيه سواقي بالحياه بتمدُهُ
وسيَّان عندهم ؛ شوكه ُ و وردهُ
ولا فى غيطانه بيسرحوا
والزهر نـــــــــــادي
آدي عيد ميــــــــــــلادي
*******
يا حُسَّـــــــادي ...
ياعيون بتستكتر عليَّ عنادي
لو جالي خيــــــــر ؛ بترُده
وان قِمت ضهري ؛ تهِدُه
ويوم عذابي يفرحوا
لو طال سُهــــــــــادي
آدي عيد ميــــــــــلادي
*******
يا بــــــــلادي ...
بصيت لسقف البيت قُصادي
كنت بحسبها سنين ويعدوا
وتعدي أحلامي السما يتحدوا
طلع عليه النهار سيَّحُه
وحالي هو حال بلادي
آدي – ياسيدي – عيد ميلادي !
******************
طارق شعبان أبو النجا
23/4/2012
بواسطة: طارق ابو النجا
