منتدى الدويدار

منتدى الدويدار

ثقافى، اجتماعى، تعارف، عائلات دويدار


    قصيدة جحا للشاعر هشام الجخ ----- روعه

    شاطر
    avatar
    نجلاء دويدار

    عدد المساهمات : 151
    تاريخ التسجيل : 23/10/2010

    قصيدة جحا للشاعر هشام الجخ ----- روعه

    مُساهمة  نجلاء دويدار في الإثنين يناير 24, 2011 1:17 am

    لم أكتب الشعر يوماً لكنى أعشقه ، أشعر به و أتذوقه . بل و أبحث عن الجيد منه بحثاً دؤوباً ، و عندما أجده كلماته تعلق بذهنى و أتذكرها عندما ينتابنى احساس يشابه ما ورد به ، وهذا ما حدث عندما قرأت كلمات " بلدى كفايه ... انتى ايه ما بتسمعيش " فقد ذكرنى احساس الغضب و القهر بها بقصيدة " جحا " للشاعر الشاب " هشام الجخ " والقصيدة رغم كلماتها القاسية الا أنها تعبر عن لحظات الغضب و القهر التى يعيشها كثير من مواطنى هذا البلد ، أنقل اليكم أجزاء من تلك القصيدة الرائعة



    شعور سخيف
    إنك تحس بإن وطنك شيء ضعيف
    صوتك ضعيف
    رأيك ضعيف

    إنك تبيع قلبك وجسمك
    وإنك تبيع قلمك وإسمك
    ما يجيبوش حق الرغيف

    يا ساقية دورى ... عدى فوقى ودوسى
    نصبوا عليا وشحتونى فلوسى
    ربطونى فيكى .. حتى ما اتغميت
    هما اللى فرحوا ووحدى أنا اتغميت

    أنا اللى صاحب البيت
    عايش بدون لازمة
    ولما مرة شكيت
    إدونى بالجزمة
    أنا اللى زارعك دهب
    بتأكلينى سباخ
    إن كان دة تقل ودلع
    بزيادة دلعك باخ

    كرامتنا متهانة
    واللقمة بإهانة
    بتخلفينا ليه لما انتى كارهانا

    يعنى ايه تبقى إنتى هبة النيل يا حلوه
    وكل يوم المية تقطع
    يعنى ايه لما اشتكى غلو الفاتورة
    يقولو تشكى بس تدفع

    لما قش الرز ثروة بتتحرق
    وأما نفط الأمة ثروة بتتسرق
    وأما جلادك على ولادك بيبطش
    وأما علمك ما يلاقيش يآكل فيطفش

    يعنى ايه نرفع ايدينا بالسلام لاجل الغزاه
    ويعنى ايه لما ابقى ماشى فى حالى اتشد اشتباه

    يعنى ايه مش حاسة بالعمر وغلاوته
    بتصبى مر العمر ليه
    دة انا كنت ح اوهب لك حلاوته

    أنا عمرى ما أتأمرت
    ولا حطيت شروطى
    ومكان ما ترسى مركبك
    بابنى شطوطى
    أنا كنت جيشك لما مماليلك باعوكى
    وكنت يوسف لما عشتى سنين عجاف
    وضلوعى دى اللى فى معركة قادش حموكى
    وشفايفى دى اللى ما بطلتش فى يوم هتاف
    دة انا كل شبر فى أرضك اتمرمغت فيه
    وكل يوم عشتيه
    أنا اتغذبت بيه

    علا صوت أدانك جرس
    فى الشدة صاحينلك
    من امتى كانوا الحرس
    هما اللى باقينلك

    بعتينى علشانهم
    وعنيكى معصوبة
    ياهل ترى خاينة
    ولا زيى مغصوبة

    كل الكلام اتقال
    والشعر بقى ماسخ
    والصبر علو جبال
    والظلم شىء راسخ


    علمونا بالعصاية
    ورضعونا الخوف رضاعة
    علمونا فى المدارس
    يعنى ايه كلمة قيام
    علمونا نخاف من الناظر
    فيتمنع الكلام
    علمونا ازاى نخاف
    وازاى نكش
    بس نسيوا يعلمونا الاحترام
    فمتزعلوش
    لما ابقى مش باسمع كلامكم
    وماتزعلوش لما ابقى خارج عن النظام

    مستنى ايه من طفل ربوه بالزعاق
    غير المشاكل والخناق

    الحب يعنى براح فى قلب العاشقين للمعشوقين
    يعنى الغلابة يناموا فى الليل دفيانين
    الحب يعنى جواب لكل المسجونين
    هما ليه بقوا مسجونين
    يعنى أعيش علشان هدف
    علشان رسالة
    يعنى احس بقيمتى فيكى
    إنى مش عايش عوالة

    يعنى لما اعرق تكافئيى بعدالة
    الحب حالة
    الحب مش شعر وقوالة

    الحب حاجة ما تتوجدش فى وسط ناس
    بتجيب غداها من صناديق الزبالة

    الدفة مظبوطة
    وأصلا مافيش دفة
    والكفة مش مايلة
    علشان مافيش كفة

    و جحا اللى جاى بالليل لساه بيتخفى
    شايف ديدان الغيط سارحة ومارحماشى
    من جبنه شاف الدود سابه وراح ماشى
    ولا اتكسف للناس
    ولا حس على طوله
    الناس عشمها كبير جريوا بيشكوله
    ضحك جحا ضحكة مواشى
    مادام بعيد عن طينى ... ماشى

    الدود قاعد لك يا جحا ولابد فى طينك
    بعد ما يمص فى دمانا مش حيحلاله الا طينك

    احنا اهلك
    احنا رجالتك
    أمانك
    إحنا وقت الشدة سندك
    إحنا زادك

    يا جحا احمى ولادك
    لو كنت عايز تحمى طينك
    سوف أرحل
    ربما يلقانى من ارجو لقاه
    هامشى ويا الشحاتين

    وابكى على حلمى اللى تاه
    بس مش هاشحت رغيف
    هاشحت وطن لله



    المصدر: قصيدة جحا للشاعر هشام الجخ










    google_protectAndRun("ads_core.google_render_ad", google_handleError, google_render_ad);

      الوقت/التاريخ الآن هو الجمعة أكتوبر 20, 2017 10:56 pm